Næg bílastæði fyrir íbúa og gesti
Undir reitnum eru opnir og rúmgóðir bílakjallarar á tveimur hæðum, með tengingu við allar byggingar, þar sem leitast er við að nýting bílastæða sé sem best fyrir íbúa og gesti. Auk bílakjallara er einnig mikill fjöldi yfirborðsstæða í kringum Orkureitinn.
Sérbílastæði fylgja fjölda íbúða
Í D húsi Orkureitsins eru sérbílastæði innifalin í kaupverði íbúða frá 120 milljónum króna. Fyrir stæðin fellur ekki til sérstakt leigu- eða áskriftargjald, heldur aðeins hefðbundinn rekstrarkostnaður sem hluti af sameign. Fyrir aðra sem vilja tryggja sér sérmerkt bílastæði eru í boði mismunandi útfærslur, svo sem kaup á bílskúr eða langtímaleiga á sérmerktum stæðum.
Skýrt skipulag um bílastæði
Keyrt er niður í bílastæðahúsið á tveimur stöðum en við rekstur þess mun gilda skýrt skipulag og markviss stýring aðgangs og umferðar með vönduðu aðgangsstýringarkerfi.
Áskrift og aðgangur
Bílakjallarinn er rekinn af rekstrarfélaginu Bílastæði ehf., dótturfélagi SAFÍR bygginga ehf. Félagið hefur sett skýrar reglur um útleigu stæða í kjallaranum. Stefnan er að útleiga bílastæða á lóðinni fullnægi þörfum íbúa og gesta þeirra fyrir geymslurými á bifreiðum auk þess sem atvinnuhúsnæði og mögulega aðrir geti einnig nýtt bílastæðakjallarann eftir því sem rými leyfir en þó ekki á kostnað íbúa.
Áskriftarréttindakerfi skiptist í nokkra flokka, eftir því hvort um íbúa, fyrirtæki eða almenna gesti er að ræða. Auk þess eru mismunandi áskriftarleiðir í boði. Nánari upplýsingar er að finna í reglum bílastæðahúss hér að neðan.
Hopp bílar góð viðbót við snjallar samgöngulausnir
Samstarf Orkureitsins við Hopp deilibíla þýðir að þeim má leggja frítt í laus stæði í bílastæðahúsi – aðeins er greitt fyrir ferðina, ekki stæðið. Markmiðið er að gera deilibílaþjónustuna aðgengilegri og að raunhæfri lausn sem fólk notar daglega. Það er í takt við áherslur Orkureitsins á snjallar og umhverfisvænar samgöngur. Stefnt er að því að Hopp bílar staldri ekki lengi við í stæðum heldur séu til taks í góðri róteringu.
Samstarfið fjölgar valkostum. Með því bjóðast íbúum og starfsmönnum á reitnum aukin þægindi til að njóta nútímalegrar bílanotkunar án eigin bíls, sem og þeim sem gætu þurft aukabíl við og við. Þessum möguleika fylgir ákveðin hugarró, og við teljum að hann muni einnig auðvelda umferð. Nánari upplýsingar um notkun Hoppbíla er að finna á Hopp.is.
Séreign og samnýting
Í samræmi við deiliskipulag svæðisins er bílastæðahúsið í grunninn leigukjallari sem rekinn er á grundvelli samnýtingar. Íbúar á Orkureitnum hafa val um hvort þeir kjósa að leigja bílastæði eða ekki, gegn hóflegu gjaldi og með því er stuðlað að sanngjarnri útdeilingu bílastæða. Bílastæði í bílastæðakjallara verða um 350 talsins. Stór hluti bílastæða verður samnýtanlegur öllum á svæðinu en tæpur þriðjungur bílastæða verða sérmerktur. Til viðbótar verða um 40 bílskúrar í séreign. Íbúar á Orkureitnum hafa forgang að leigu bílastæða. Leigjendur atvinnuhúsnæðis geta að jafnaði ekki leigt bílastæði um nætur og helgar í langtímaleigu.